Stórfurðulegt atvik átti sér stað í leiks Þórs og Kórdrengja í Lengjudeild karla á föstudag. Kórdrengir unnu 1-0 sigur en löglegt mark virðist hafa verið tekið af Þórsurum.
Skömmu eftir að Kórdrengir komust yfir jafnaði Þór leikinn og línuvörður og dómari leiksins virtist ætla að dæma markið gilt. Línuvörðurinn ætlaði ekkert að dæma og Kórdrengir ætluðu að fara að taka miðju þegar allt breytist.
„Hér sjáum við atvik leiksins, hér halda Þórsarar að þeir séu búnir að jafna. Línuvörðurinn hleypur til baka og allir halda að það sé komið mark. Kórdrengir kvarta eitthvað smá,“ sagði Hörður Snævar Jónsson stjórnandi í markaþætti Lengjudeildarinnar.
Hrafnkell Freyr Ágústsson sérfræðingur þáttarins var hissa og segir að Akureyringar geti verið vel pirraðir yfir þessu.
„Þetta er eitt það furðulegasta sem ég hef séð, þetta er aldrei rangstaða. Hvernig dómararnir framkvæma þetta, þeir tala sig eiginlega inn á rangstöðu. Þórsarar mega vera mjög pirraðir.“
Atvikið má sjá hér að neðan.