Freyr Alexandersson fyrrum aðstoðarþjálfari íslenska landsliðsins er þessa stundina staddur í Danmörku í viðræðum við félag þar í landi. Þetta herma öruggar heimildir 433.is.

Freyr flaug af landi brott um helgina en samkvæmt sömu heimildum leikur umrætt félag í næst efstu deild þar í landi.

Freyr lét af störfum sem aðstoðarþjálfari Al-Arabi í maí þegar Heimir Hallgrímsson lét af störfum á sama tíma. Freyr hefur síðustu daga og vikur átt samtal við danska félagið en viðræður hafa þokast áfram og flaug Freyr út um helgina.

Kjaftasögur hafa verið á kreiki um að Freyr gæti komið til greina sem næsti þjálfari FH en litlar líkur eru á því. FH hefur aðeins náð í eitt stig í síðustu fimm leikjum og er pressa á Loga Ólafssyni þjálfara liðsins.

Það kemur í ljós á allra næstu dögum hvort Freyr taki við danska félaginu en fleiri félög hafa sýnt honum áhuga samkvæmt sömu heimildum.