Rodrigo de Paul, argentískur miðjumaður Udinese á Ítalíu, mun ganga í raðir Atletico Madrid. Fabrizio Romano greinir frá þessu.
De Paul hafði verið orðaður við Arsenal og Liverpool. Bæði lið leita að styrkingu á miðsvæðið.
Það er hins vegar klárt að Spánarmeistarar Atletico eru að krækja í hann. Udinese hefur þegar samþykkt tilboð upp á 35 milljónir evra í Argentínumanninn.
De Paul er með argentíska landsliðinu í Suður-Ameríku bikarnum þessa stundina. Hann mun fljúga til Madrídar til þess að gangast undir læknisskoðun um leið og Argentína hefur lokið keppni þar.
Þessi 27 ára gamli miðjumaður hefur verið langbesti leikmaður Udinese í Serie A síðustu tímabil. Hann mun án efa koma til með að styrkja miðjuna hjá Atletico á næstu leiktíð í tilraun liðsins til að verja Spánarmeistaratitilinn.