Mikael Nikulásson segir Óskar Hrafn Þorvaldsson, þjálfara Breiðabliks, vera sigurvegara í félagaskiptum Róberts Orra Þorkelssonar frá félaginu út í atvinnumennsku. Málið var rætt í nýjasta þætti hlaðvarpsins The Mike Show.
Róbert Orri, sem er 19 ára gamall miðvörður, er að ganga í raðir Montreal Impact í MLS-deildinni. Liðið er í Kanada og er Róbert keyptur til félagsins frá Breiðabliki. Mun hann ganga í raðir félagsins þegar félagaskiptaglugginn opnar.
Talað hefur verið um að kaupverðið á honum sé á bilinu 30-40 milljónir íslenskra króna. Mikael segir það hins vegar vera nær 25 milljónum.
Róbert Orri hefur aðeins leikið 16 leiki í efstu deild fyrir Blika. Mikael lítur á það sem sigur fyrir Óskar Hrafn að vera að koma Róberti út í atvinnumennsku eftir svo fáa leiki.
,,Ég held að sigurvegarinn í þessu hljóti að vera Óskar Hrafn Þorvaldsson. Blikarnir hljóta bara að gefa honum nýjan tíu ára samning. Óskar er búinn að gera fullt fyrir hann. Að þeir séu að fá 20 milljónir fyrir hann núna. Róbert Orri er ekki búinn að vera besta varnarmaðurinn í þessari deild.“