Donny van de Beek þráir að enda dvöl sína hjá Manchester United eftir mikið vonbrigðatímabil og telur að Barcelona væri kjörinn áfangastaður samkvæmt ýmsum spænskum miðlum.
Umboðsmaður kappans hefur haft samband við Barcelona og vinnur hörðum höndum að því að koma honum burt frá United að því er segir í frétt Sport.
Van de Beek er sagður vera ósáttur hjá United eftir að hafa verið í algjöru varahlutverki hjá félaginu á tímabilinu þrátt fyrir að hafa verið keyptur frá Ajax fyrir 40 milljónir punda síðasta sumar.
Leikmaðurinn byrjaði aðeins fjóra leiki í ensku úrvalsdeildinni og var á eftir Bruno, Pogba, McTominay, Fred og Matic í röðinni.
Eftir að hafa verið hundsaður allt tímabilið af Solskjaer vill Van de Beek leita á ný mið og markmiðið er Barcelona jafnvel þó það verði lánssamningur.
Börsungar eru að leita að miðjumanni eftir að Gini Wijnaldum samdi óvænt við PSG fyrr í mánuðinum. Barcelona hafði áhuga á Van de Beek síðasta sumar en hann valdi Manchester United að lokum.