Rio Ferdinand vill að Manchester United semji við Jack Grealish en telur að það verði erfitt að koma honum fyrir með Paul Pogba og Marcus Rashford.
Jack Grealish, sem er nú með enska landsliðinu á Evrópumótinu í knattspyrnu, er talinn ætla að yfirgefa Aston Villa í sumar eftir frábært tímabil í ensku úrvalsdeildinni. Manchester City hefur einnig áhuga á kappanum.
Rio Ferdinand telur að Grealish væri að keppa við Pogba og Rashford um byrjunarliðssæti og gæti það verið vandamál.
„Auðvitað ættu United að semja við hann. Allan daginn. Bruno Fernandes er ekki vandamál, Rashford og Pogba spila báðir vinstra megin þar sem Jack spilar,“ sagði Ferdinand við UMM Youtube þáttinn.
„Besta staða hans er vinstra megin og næstbesta staðan er í tíunni. Þetta eru stöðurnar sem við höfum góða leikmenn í nú þegar. Þess vegna er erfitt að sjá hann fyrir sér hjá United núna.“
„Ef hann fer frá Villa, þá held ég að það verði ekki Manchester United, nema þeir losi hina tvo frá klúbbnum.“