Szczesny hefur ekki átt sjö dagana sæla þegar kemur að Evrópumótinu í knattspyrnu. Hann er aðalmarkvörður pólska landsliðsins og lenti í því leiðinlega atviki að skora sjálfsmark í gær, sem reyndist vera fyrsta sjálfsmark markvarðar í sögu EM. Robert Mak hafði gert vel og tók skotið sem fór í stöng, í Szcezny og þaðan í markið.
Þetta var þriðja skiptið sem leikmaðurinn hefur spilað á EM og alltaf hefur honum gengið illa í fyrsta leik.
Árið 2012 voru Pólverjar gestgjafar mótsins ásamt Úkraínu og hófu Pólverjar leik gegn Grikkjum. Szczesny byrjaði í markinu og gaf fyrsta markið og fékk svo rautt spjald seinna í leiknum og gaf vítaspyrnu. Hann spilaði ekki fleiri leiki á því móti.
Árið 2016 var heldur ekki gott fyrir kappann en hann spilaði í 1-0 sigri gegn Norður-Írum í fyrsta leik. Hann meiddist í leiknum og gat ekki tekið þátt meira í mótinu.
Pólland spilar næst gegn Spánverjum á laugardaginn og loks gegn Svíum á miðvikudaginn í næstu viku. Szczesny hefur því enn tækifæri á að snúa EM sér í hag.