Cristiano Ronaldo er mættur á sitt fimmta Evrópumót með Portúgal og stefnir hann líklegast á að verja titilinn í ár. Þeir eiga leik gegn Ungverjalandi í dag á Puskas-vellinum í Budapest.
Á blaðamannafundi í gær var búið að stilla upp tveimur kókflöskum fyrir framan hann enda er Coca Cola einn stærsti styrktaraðili mótsins. Ronaldo er þekktur fyrir afar heilbrigðan lífsstíl og vildi alls ekki hafa flöskurnar fyrir framan sig, þrátt fyrir að ein þeirra hafi verið sykurlaus.
Eftir að hann settist niður, renndi hann flöskunum til hliðar, tók upp vatnsflösku og sagði fólki að drekka vatn. Hann verður seint kallaður slæm fyrirmynd fyrir þetta uppátæki sitt.
Þó svo að þessi 36 ára gamli sóknarmaður geri allt til að vera í sem bestu formi, þá viðurkenndi hann fyrr á árinu að hann laumast stundum í að fá sér pizzu. Hann er því víst mannlegur eins og við hin.