Stjórstjarnan Cristiano Ronaldo hefur slegið ansi mörg met og þegar hann leiðir lið sitt inn á völlinn á morgun gegn Ungverjum þá getur hann slegið eitt í viðbót ef hann skorar. Hann verður eini leikmaðurinn til þess að skora á fimm Evrópumótum.
„Þetta met skiptir mig ekki öllu máli,“ sagði Ronaldo á blaðamannafundi í dag.
„Þetta er frábært met en það skiptir meira máli að vinna EM aftur. Liðið er tilbúið, bæði líkamlega og andlega. Leikmennirnir eru ungir en það kemur ekki í veg fyrir að við látum okkur dreyma. Þetta er fimmta mótið mitt en fyrir mig er þetta eins og það fyrsta.“
Portúgal er ríkjandi Evrópumeistari og eru margir á því að lið Portúgala sé sterkara í ár en 2016 þegar þeir unnu mótið. Ronaldo Pepe, Moutinho, Patricio og Fonte eru enn í liðinu en Bruno Fernandes, Bernardo Silva, Ruben Dias og Diogo Jota hafa allir bæst við.
Fyrsti leikur Portúgal fer fram á morgun klukkan 16:00 þegar þeir mæta Ungverjum.