Pólland og Slóvakía mættust í fyrsta leik E-riðils í kvöld á Evrópumótinu í knattspyrnu. Slóvakar höfðu betur, 1-2.
Leikurinn byrjaði nokkuð rólega og bæði lið voru varkár til að byrja með. Robert Mak átti frábær tilþrif á 18. mínútu, þegar Slóvakar komust yfir, og skaut í stöngina en þaðan fór boltinn í Szcesny og inn í mark. Slóvakar leiddu í hálfleik, 0-1.
Linetty jafnaði strax fyrir Pólland í byrjun seinni hálfleiks. Leikmenn Póllands spiluðu meiri sóknarleik í seinni og stjórnuðu leiknum til að byrja með en Mak var alltaf hættulegur í skyndisóknum fyrir Slóvaka. Á 62. mínútu fékk Krychowiak sitt seinna gula spjald og þar með rautt og þá tóku Slóvakar aftur við sér og kom Skriniar þeim yfir stuttu síðar.
Slóvakar fara á topp E riðils með sigrinum á meðan Pólland situr á botninum. Hin liðin í E-riðli, Spánn og Svíþjóð, mætast í Sevilla klukkan 19:00.
Pólland 1 – 2 Slóvakía
0-1 Szcesny (´18)
1-1 Linetty (´46)
1-2 Skriniar (´69)
Rautt spjald Krychowiak (´62)