Það kom fram í hlaðvarpsþættinum Dr. Football í dag að spænska stórveldið Valencia hefði áhuga á Hilmi Rafni Mikaelssyni, ungum leikmanni Fjölnis.
Hilmir hefur skorað fjögur mörk í sex leikjum með Fjölni í deild og bikar það sem af er tímabili. Hann er fæddur árið 2004 og því aðeins sautján ára gamall.
,,Svo er strákur þarna í Fjölni sem hefur lítið verið talað um, fæddur 2004 og heitir Hilmir Rafn Mikaelsson, örugglega fyrsti leikmaðurinn frá Hvammstanga sem getur eitthvað. Það sem er magnað við hann er að Valencia hefur áhuga á honum,“ sagði Hrafnkell Freyr Ágústsson í þættinum.
Valencia er stórt félag á Spáni. Það hefur unnið La Liga sex sinnum, síðast árið 2004. Valencia endaði í þrettánda sæti deildarinnar á síðustu leiktíð.
Smelltu hér til að hlusta á þátt Dr. Football frá því í dag.