Chelsea tók á móti Real Madrid í seinni leik liðanna í undanúrslitum Meistaradeildar Evrópu í vikunni. Fyrri leik liðanna lauk með 1-1 jafntefli og Chelsea vann í gær 2-0 sigur og er því komið áfram í úrslitaleikinn með samanlögðum 3-1 sigri úr einvíginu. Leikur kvöldsins fór fram á Stamford Bridge í Lundúnum. Fyrsta mark leiksins leit dagsins ljós á 28. mínútu, það skoraði Timo Werner eftir stoðsendingu frá Kai Havertz. Það var síðan miðjumaðurinn Mason Mount, sem innsiglaði 2-0 sigur Chelsea og sæti í úrslitaleiknum með marki á 85. mínútu eftir stoðsendingu frá Christian Pulisic.
Eden Hazard fyrrum leikmaður Chelsea var í liði Real Madrid í leiknum en mikil reiði er á Spáni með hegðun hans eftir leik. Hazard sást þar brosandi og í góðu stuði eftir að lið hans féll úr leik.
Mikil dramatík í spænsku sjónvarpi í gær. Helvíti sáttir við Hazard. Við verðum á svipuðum nótum a eftir. pic.twitter.com/Rkuni1mKco
— Dr. Football Podcast (@drfootballpod) May 6, 2021
„Ég biðst afsökunar, ég hef lesið mikið um mig eftir þetta og ég ætlaði ekki að vanvirða stuðningsmenn Real Madrid,“ sagði Hazard um málið í yfirlýsingu.
„Það hefur alltaf verið draumur minn að spila fyrir Real Madrid og ég kom hingað til að vinna. Tímabilið er ekki búið og saman verðum við að berjast til að vinna La Liga.“