2. deild karla fór af stað í kvöld með tveimur leikjum. Njarðvík og Þróttur Vogum gerðu jafntefli í markaleik á meðan nýliðarnir í Reyni Sandgerði unnu Hauka.
Liðin sem margir spá upp skildu jöfn
Njarðvík komst yfir efir um stundarfjórðung á heimavelli sínum gegn Þrótti Vogum. Þar var að verki Kenneth Hogg. Næsta mark lét bíða eftir sér þar til rúmur klukkutími var liðinn af leiknum. Þá skoraði Zoran Plazonic. Ragnar Þór Gunnarsson minnkaði muninn fyrir Þrótt á 75. mínútu en Hogg skoraði sitt annað mark skömmu síðar. Þrátt fyrir að heimamenn hafi verið komnir í góða stöðu tókst Hermanni Hreiðarssyni og félögum að jafna. Ruben Lozano Ibancos minnkaði muninn fyrir þrótt áður en Hubert Rafal Kotus jafnaði. Lokatölur 3-3 á milli þessara liða sem margir spá góðu gengi í sumar.
Slæm byrjun hjá Haukum
Haukar tóku á móti Reyni Sandgerði. Strahinja Pajic kom gestunum yfir þegar tæpar 20 mínútur lifðu leiks. Magnús Þór Matthíasson gulltryggði svo sigur þeirra af vítapunktinum undir lok leiks. Slæmt tap fyrir Hauka sem eru á sínu öðru tímabili í 2. deild eftir að hafa fallið úr næstefstu deild árið 2019. Hins vegar eru þetta virkilega sterk stig fyrir nýliða Reynis á útivelli í fyrsta leik.