Manchester United, þurfti á lögreglufylgd að halda á leið sinni á flugvöllinn í Manchester þaðan sem liðið hélt til Rómar sökum undanúrslitaleiksins við heimamenn sem fram fer á morgun.
Mótmæli stuðninsmanna Manchester United á sunnudaginn þóttu gefa ástæðu til þess að auka við þá gæslu sem liðið fær þessa dagana.
Stuðningsmenn Manchester United, sem hafa verið að mótmæla eignarhaldi Glazer-fjölskyldunnar á félaginu, brutu sér leið inn á heimavöll liðsins, Old Trafford á sunnudaginn með þeim afleiðingum að fresta þurfti leiknum.
Uppspretta mótmælanna er óánægja stuðningsmanna Manchester United með eignarhald Glazer fjölskyldunnar á félaginu. Almenn óánægja með eigendur félagsins hefur verið við líði í nokkur ár, dropinn sem fyllti mælinn var ákvörðun eigendanna um að Manchester United gerðist stofnaðili að Ofurdeildinni, deild sem á endanum ekkert varð af.
Leikmenn og starfslið Manchester United komst klakklaust áleiðis á flugvöllinn og mun mæta Roma á morgun í seinni leik undanúrslitanna í Evrópudeildinni. Manchester United fer með örugga forystu inn í viðureignina en fyrri leikur liðanna endaði með 6-2 sigri Manchester United.