Ibrahima Konate er á barmi þess að ganga í raðir Liverpool frá RB Leipzig. Sagt er frá því að Konate muni skrifa undir fimm ára samning á Anfield.
Konate var sterklega orðaður við Liverpool fyrir nokkru síðan en það virtist hafa dottið út af borðinu. Nú er greint frá því að allt sé svo gott sem klárt.
„Þetta er að gerast, þetta snýst bara um smá tíma,“ sagði Fabrizio Romano helsti sérfræðingur fótboltans í félagaskiptum.
„Samkomulagið við Konate er í höfn, Liverpool vill fá hann og klárar nú viðræður við Leipzig.“
Konate er með klásúlu sem gerir honum kleift að fara fyrir 30 milljónir punda en viðræðurnar snúast um að Liverpool fái að greiða fyrir Konate í nokkrum greiðslum.
Konate er 21 árs franskur varnarmaður en honum er ætlað að mynda öflugt par með Virgil van Dijk varnarmanni félagsins.