Uppsögn Rúnars Pál Sigmundssonar úr starfi sem þjálfari Stjörnunnar í morgun kom öllum í opna skjöldu, þeim sem stjórna félaginu og ekki síst leikmönnum. Leikmenn Stjörnunnar voru grunlausir um að Rúnar væri að fara að segja upp störfum, Rúnar stýrði æfingu liðsins í gær ásamt Þorvaldi Örlygssyni og eiga leikmenn Stjörnunnar að mæta á æfingu síðar í dag.
„Ég vísa bara í tilkynninguna, það er ekkert sem ég get ekki sagt meira,“ sagði Helgi Hrannarr Jónsson formaður meistaraflokksráðs Stjörnunnar í samtali við 433.is þegar hann var beðinn um að útskýra ástæðuna fyrir uppsögn Rúnars.
Sæmundur Friðjónsson formaður knattspyrnudeildar tekur í sama streng. „Það er best að Rúnar svari fyrir þetta, átta ár í starfi er langur tími. Það er ekkert óvænt nema tímapunkturinn. Ekkert sérstaklega góður tímapunktur, átta er langur tími. Þetta er ekki þannig að þetta sé í einhverjum leiðindum, þetta er ekki eitthvað sem gerist á síðustu vikum eða í gær eða í dag. Þetta hefur lengri aðdraganda,“ sagði Sæmundur í samtali við 433.is
Ekki hefur náðst í Rúnar Pál í dag. Samkvæmt heimildum 433.is hafa nokkur mál komið upp undanfarna mánuði sem búið hafa til núning milli stjórnar og Rúnars. Eitt af stærri málunum er málefni Sölva Guðbjargarsonar sem Breiðablik reynir nú að fá.
Breiðablik hefur hafið viðræður við Sölva sem verður samningslaus í haust, það mál varð til þess að Rúnar Páll ákvað að hætta við æfingaleik skömmu fyrir mót sem liðið átti við Breiðablik. Málið allt hefur samkvæmt heimildum lagst illa í Rúnar.
Þá átti Rúnar Páll aðeins þetta tímabil eftir af samningi sínum við Stjörnuna og eru viðræður um nýjan samning ekki sagðar hafa borið árangur.
Helgi Hranarr segir að stjórn Stjörnunnar muni ekki svara meira fyrir málið, það sé Rúnars að útskýra hlutina betur ef hann hefur áhuga á því. „Nei það er ekki okkar að svara meira fyrir þetta, Rúnar Páll verður að svara ef það er eitthvað sérstakt sem hann vill að komi fram. Það er ekkert sem við getum sagt.“
Uppsögn Rúnars kom öllum á óvart en Helgi vildi ekki segja til um hvort uppsögn Rúnars borið brátt að. „Kom þetta ekki bara á öllum á óvart svona almemnt?“
Ekki kom fram í tilkynningu Stjörnunnar hver myndi stýra liðinu en Helgi Hrannarr staðfestir að Þorvaldur Örlygsson taki nú einn við liðinu. „Hann var þjálfari ásamt Rúnari og verður áfram þjálfari, við þurfum ekkert að tilkynna neitt sérstaklega um það.“