Everton hefur áhuga á því að fá Gareth Bale frá Real Madrid í sumar, kantmaðurinn hefur verið á láni hjá Tottenham í vetur en ekki fengið mörg tækifæri.
Þessi 31 árs kantmaður var keyptur til Real Madrid árið 2013 af Carlo Ancelotti, nú stjóra Everton. Ancelotti hefur mikinn áhuga á að fá Bale aftur til sín.
Real Madrid vill losna við Bale af launaskrá í sumar og spænskir miðlar segja að kaupverðið á honum verði lítið sem ekkert.
Bale átti frábæran tíma á Englandi með Tottenham áður en hann fór til Spánar, þar lék hann með Gylfa Þór Sigurðssyni sem nú er hjá Everton.
„Ancelotti hefur spurst fyrir um Bale, leikmaður sem hann elskaði að vinna með. Hann vill fá hann til Everton,“ sagði Eduardo Inda blaðamaður á Spáni um málið.
Inda segir að Everton muni ekki leggja fram hátt tilboð og vonast félagið hreinlega til að fá hann frítt.