Arnar Þór Viðarsson landsliðsþjálfari Íslands segir að eitthvað hafi komið upp á í fjölskyldu Ragnars Sigurðssonar sem varð þess valdandi að hann yfirgaf herbúðir íslenska landsliðsins í gær.
Ragnar var mættur með landsliðinu til Dallas í Bandaríkjunum þar sem liðið mætir Mexíkó á morgun, Ragnar hvarf á brott mjög skyndilega og komu tíðindin á óvart.
„Raggi kom til mín og tilkynnti að hann þyrfti að yfirgefa hópinn, það er eitthvað tilfallandi í fjölskyldunni hans. Persónulegar ástæður,“ sagði Arnar Þór á fréttamannafundi í dag í Dallas.
Arnar segir ljóst að menn ferðist ekki til Dallas til þess að yfirgefa hópinn sólarhring síðar án ástæðu. „Menn hopp ekkert frá Dallas nema að það sé eitthvað sem menn þurfa að taka á í sinni fjölskyldu. Það er það eina sem við vitum, ég myndi gjarnan vilja hafa Ragga hérna.“
Planið var að Ragnar myndi ekki spila á morgun en hann er án félags. „Við vildum hafa Ragga og sjá hversu langt við kæmumst með hann, sjá hvar hann stæði og svo myndi hann spila í leik tvö og þrjú. Því miður þá kom eitthvað upp, við vonum að það verði í lagi.“
Allir aðrir leikmenn liðsins sem fóru til Dallas eru heilir heilsu. „Það var svolítið sjokk að missa Ragga,“ sagði Arnar og sagði að allir aðrir væru heilir heilsu.