Eiríkur Jónsson hinn nokkuð umdeildi blaða og fréttamaður skrifar frétt á heimasíðu sína í dag sem vakið hefur mikla athygli.
Þar er því slegið upp að Björgólfur Thor Guðmundsson, ríkasti maður Íslands um langt skeið teikni nú upp leynisamning við Gylfa Þór Sigurðsson, fremsta knattspyrnumann Íslands.
Í frétt sem Eiríkur birtir á vef sínum er Björgólfur Thor sagður reyna að lokka Gylfa í KR, Björgólfur er harður KR-ingur líkt og faðir hans Björgólfur Guðmundsson.
„Sagt er og mikið rætt í boltaheimi að fyrir liggi uppkast að samningi á milli auðkýfingsins Björgólfs Thor og knattspyrnusnillingsins Gylfa Þórs hjá Everton um að Gylfi komi heim og leiki með KR eftir tvö ár eða svo. Gylfi hefur nýverið viðrað heimþrá sína í fjölmiðlum eftir 16 ár í útlöndum en Gylfi verður 32 ára á þessu ári,“ segir í frétt Eiríks á heimasíðu hans.
Gylfi sjálfur hefur sagt ítrekað í viðtölum að ólíklegt sé að hann leiki knattspyrnu á Íslandi, ef hann kemur heim er næsta víst að hann mun aðeins leika fyrir FH. Gylfi lék með FH og Breiðablik áður en hann hélt 16 ára gamall í atvinnumennsku.