Benedikt Bóas Hinriksson blaðamaður á Fréttablaðinu var í góðum í gír í sjónvarpsþætti 433.is á Hringbraut í gær. Benedikt er reglulegur gestur í þættinum og fer yfir það helsta í heimi fótboltans.
Eitt af því sem Benedikt ræddi í gær voru sérfræðingar í sjónvarpi og hlaðvarpi, hann vildi sérstaklega hrósa þremur af þeim sem nú eru áberandi í umræðu um íslenskan fótbolta. „Eftir hverja umferð er rosalega mikið talað og mikið sýnt, sumir betri en aðrir. Arnar Sveinn Geirsson hefur komið eins og stormsveipur inn í íslenska umræðu, gjörsamlega frábær í Dr. Football,“ sagði Benedikt um fyrrum leikmann Vals og Breiðabliks sem slegið hefur í gegn í hlaðvarpsþættinum.
Ólafur Jóhannesson er á sínu fyrsta ári sem sérfræðingur í sjónvarpi og hefur slegið í gegn í Stúkunni á Stöð2 Sport. „Óli Jó, það vissu margir að hann yrði ekki geggjaður en ekki svona geggjaður. Hann er fyndinn og allt sem hann segir hnyttið, hann getur skotið á menn og haft efni á því.“
Benedikt hrósaði einnig Atla Viðar Björnssyni sem hefur síðustu árið verið á Stöð2 Sport. „Atli Viðar finnst mér orðinn geggjaður,“ sagði Benedikt.
Benedikt var í magaspeglun á mánudag og var því nokkuð lyfjaður þegar hann horfði á boltann um kvöldið. „Mér finnst Atli Viðar góður, rökstuðningurinn er ekkert meiri en það. Í gær var ég útúr lyfjaður að horfa á Stúkuna, vissi hvorki í þennan heim né annan en ég skildi Atli Viðar,“ sagði Benedikt léttur í lund.