Michael Owen einn af betri framherjum sem England hefur átt og Cesc Fabregas einn besti miðjumaður í heimi síðustu árin þegar kemur að því að skapa mörk fóru í hár saman á Twitter í gær.
Owen byrjaði á að gera lítið úr stoðsendingum og hvernig byrjað er að tala um þær í sama tón og talað er um mörk. Fabregas var fljótur að svara framherjanum á Twitter.
„Fólk er í alvörunni í dag byrjað að gefa mönnum jafn mikið lof fyrir stoðsendingar eins og mörk. Það er þannig að í tíunda hverju marki er það stoðsendingin sem er frábær, annars eru þetta fimm metra sendingar sem menn fá jafn mikið hrós fyrir og fallegt mark,“ skrifaði Owen.
„Það er auðvitað fallegt að sjá góða sendingu en það er miklu erfiðara að skora en að leggja upp mark. Samt er þetta jafn mikið í umræðunni.“
Fabregas sem þekktur hefur verið fyrir sína snilli í að leggja upp mörk svaraði Owen. „Ég er ekki sammála þér Michael, að búa til og skapa mark getur verið helminga erfiðara en að hlaupa og skora mark;“ sagði Fabregas.
„Ekki gera lítið úr þeim litla tíma og svæði sem miðjumenn hafa til að taka bestu ákvörðunina fyrir ykkur framherjana.“