Kjartan Henry Finnbogason framherjinn knái hefur rift samningi sínum við Esbjerg og getur því haldið heim á leið.

Kjartan fékk samningi sínum rift eftir að ljóst varð að Esbjerg kemst ekki upp í úrvalsdeildinni, Ólafur Kristjánsson var rekinn sem þjálfari liðsins í gær eftir að það varð ljóst.

Kjartan sem er 34 ára gamall gekk í raðir Esbjerg í upphafi árs en hann ætlaði sér að koma heim um mitt sumar.

Nú er ljóst að Kjartan er á heimleið og mun hann skrifa undir hjá KR við heimkomu. Kjartan lék með KR frá 2010 til 2014 og sló í gegn en síðan þá hefur hann átt farsælan feril í atvinnumennsku.

KR-ingar hafa verið að styrkja lið sitt en Finnur Tómas Pálamson kom til félagsins á láni í síðustu viku.