Sadio Mané, leikmaður Liverpool, hefur ekki átt gott tímabil fyrir Englandsmeistarana. Hann hefur einungis skorað 7 mörk í 27 leikjum á tímabilinu og aðeins 3 mörk úr síðustu 23 leikjum.

Þetta er leikmaður sem tímabilið 2018-19 var markahæstur í ensku úrvalsdeildinni ásamt Mohamed Salah og Pierre-Emerick Aubameyang og fyrir minna en 18 mánuðum fannst sjálfum Lionel Messi ósanngjarnt að hann hafi aðeins endað fjórði í Ballon d´Or.

Blaðamenn The Athletic velta fyrir sér hvað hafi farið úrskeiðis hjá kappanum þetta tímabilið og sýna ansi áhugaverða tölfræði.

Hann gerir fleiri árásir með boltann þetta tímabilið, tekur fleiri skot og snertir boltann oftar í teig andstæðinganna. Þetta bendir á það að tölfræðin hjá honum er ekki endilega verri í ár frá tímabilinu í fyrra en vandamálið liggur í nýtninni, þ.e. hann nýtir færin sín ekki vel.

Hann fór fram úr sínu xG (expected goals) síðustu 2 tímabil en langt aftur úr þetta tímabilið.

Tímabilið 2018-19 skoraði hann mark á hverjum 140 mínútum en þetta tímabilið á 323 mínútna fresti. Hann hefur aldrei verið jafn mikið undir væntingum hvað varðar xG síðan hann kom til félagsins. Fyrir áhugasama þá eru Timo Werner og Trezeguet einu framherjar ensku deildarinnar sem hafa skorað minna miðað við þeirra xG.

Hér að neðan má sjá twitter færslu James Pearce (höfundar greinarinnar) og áhugaverðar myndir sem sýna tölfræði Mane.

Sadio Mane is dribbling more, shooting more and having more touches in the opposition box. The defensive side of his game is still excellent but the goals have dried up. #LFC https://t.co/Qv9MgY4AeQ pic.twitter.com/BW5YGrGcPE

— James Pearce (@JamesPearceLFC) April 9, 2021