Steven Gerrard, stjóri Rangers í Skotlandi, er brjálaður eftir að leikmaður hans, hinn 19 ára gamli Nathan Patterson fékk 6 leikja bann fyrir að brjóta sóttvarnarreglur í landinu. Patterson og fjórir aðrir leikmenn fengu refsinguna eftir að hafa mætt í ólöglegt samkvæmi í febrúar þegar sóttvarnarreglur vegna Covid-19 voru sem strangastar. Rangers hefur áfrýjað dómnum.
„Ég er alls ekki ánægður með þetta og er viss um að Steve Clarke er það ekki heldur. Nathan er að vaxa og vaxa, það er synd að hann þurfi að missa af næstu leikjum,“ sagði Gerrard á blaðamannafundi.
„Við ætlum að áfrýja vegna þess að við teljum að refsingin hafi verið of hörð, það þarf einnig að taka til aldurs strákanna og hversu mikið þetta getur skaðað feril þessara leikmanna til frambúðar.
„Leikmaðurinn mun spila fyrir Skotland og því skil ég ekki afhverju skoska knattspyrnusambandið vill senda hann í svona langt bann.“