Jamie Carragher, fyrrum leikmaður Liverpool til fjölda ára, hvetur Jurgen Klopp, stjóra Liverpool, til þess að gefast upp á því að spila Mohamed Salah, Sadio Mane og Roberto Firmino saman í fremstu víglínu Liverpool.
Carragher segir að vandræði Liverpool á leiktíðinni stafi ekki einungis af meiðslum í vörninni. Að hans sögn liggur sökin einnig hjá sóknarmönnunum sem hafa ekki staðið sig.
Salah hefur átt flott tímabil heilt yfir, skorað 29 mörk. Þá hefur Mane skorað 13 og Firmino aðeins sex.
,,Fólk talar um vandamál í miðri vörn Liverpool. Þeirra stærsta vandamál er hinum megin á vellinum,“ sagði Carragher á Sky Sports í vikunni.
,,Þeir fengu Diogo Jota inn og hann hefur skorað nokkur mörk en ég sagði það fyrir sex mánuðum að það þyrfti að brjóta upp fremstu víglínu.“
,,Þegar þú horfir á frábær sóknarteymi í gegnum tíðina þá sérðu þá kannski endast í þrjú ár og svo er því breytt. Framlína Liverpool hefur verið saman í fjögur eða fimm ár svo það þarf að brjóta hana upp í sumar.“
Tímabilið hefur verið erfitt fyrir Liverpool. Liðið er í 6.sæti, fjórum stigum á eftir Chelsea sem er í fjórða sæti. Þá á Liverpool erfiðan leik gegn Manchester United á sunnudag.