David Cox knattspyrnumaður frá Skotlandi hefur lagt skóna á hilluna, ástæðan er andlegt ofbeldi sem hann hefur mátt þola. Cox hefur opinberlega talað um andleg veikindi sín og að hann hefði í nokkur skipti reynt að taka eigið líf.
Mótherjar hans í neðri deildum á Skotlandi hafa gert grín að veikindum hans. Í gær var hann svo í leikmannahópi Albion Rovers er liðið mætti Stenhousemuir í fjórðu efstu deild, þar sakar hann mótherja sinn um andlegt ofbeldi.
„Síðari hálfleikur er að hefjast en ég hef yfirgefið völlinn,“ sagði Cox í beinni útsendingu á Facebook.
„Ég var á bekknum í fyrri hálfleik en einn af leikmönnum Stenny kom að mér í hálfleik og sagði mér að ég hefði átt að taka eigið líf í fyrstu tilraun,“ sagði Cox og var niðurlútur.
„Ég hafði lofað mér því að ganga af velli ef þetta kæmi fyrir aftur, ég er hættur í fótbolta. Sumir segja að þetta sé ekkert stórmál en þetta er hræðileg. Ég get ekki meira.“
„Ég fæ ekki nógu mikið borgað til að standa í þessu, ég reyndi að ræða við dómarann en hann sagðist ekkert geta gert í svona.“
