Stjarnan og Breiðablik ætluðu að mætast í æfingaleik í gær. Allt kom þó fyrir ekki. Ástæðan er talin vera sú að Stjörnumenn hafi verið ósáttir með það að Blikar hafi viljað ræða við Sölva Snæ Guðbjargarson, leikmann þeirra fyrrnefndu.
Málið var rætt í hlaðvarpsþættinum Dr.Football í gær. Reglurnar á Íslandi eru þannig að þegar leikmenn eiga 6 mánuði eða minna eftir af samning er öðrum liðum heimilt að ræða við þá varðandi hugsanleg félagaskipti að samningi loknum.
,,Breiðablik lét Stjörnuna vita að þeir ætluðu að ræða við Sölva Snæ Guðbjargarson, tengdason Rúnars Páls (Sigmundssonar), þjálfara Stjörnunnar,“ sagði Kristján Óli Sigurðsson í þættinum.
Þetta á að hafa farið illa í menn í Garðabænum.
,,Það fór ekki betur en svo í silfurskeiðarbatteríið að þeir bara ‘erum hættir við þennan leik, spilum ekki við ykkur’, bætti Kristján við.
Sem fyrr segir þá varð ekkert úr þessum æfingaleik. Pepsi Max-deild karla hefst um næstu helgi. Stjarnan tekur á móti Leikni Reykjavík og Blikar taka á móti KR í stórleik.