José Mourinho, var á mánudag rekinn úr starfi knattspyrnustjóra hjá Tottenham Hotspur. Gengi Tottenham hefur ekki staðist væntingar á tímabilinu, liðið hefur aðeins náð í einn sigur úr síðustu sex leikjum í öllum keppnum og vonir um sæti í Meistaradeild Evrópu á næsta tímabili eru nánast úr sögunni.

Mourinho tók við Tottenham í nóvember árið 2019 eftir að Mauricio Pochettino var sagt upp störfum, ákvörðun sem var umdeild á sínum tíma. Til mikils var ætlast af Mourinho sem hefur verið mjög sigursæll á sínum ferli, hann átti að koma Tottenham upp á næsta stig, vinna titla.

„Hann hefur unnið titla hjá öllum þeim félögum sem hann hefur starfað hjá. Við trúum að hann færi liðinu orku og trú,“ sagði Daniel Levy, stjórnarformaður Tottenham eftir að Mourinho hafði verið ráðinn.

Telegraph fjallar um málið og segir að Mourinho hafi verið rekinn á tveggja tíma fundi með Levy á mánudagsmorgun, hann var klæddur til að stýra æfingu og átti ekki von á uppsögn.

Eftir að hafa verið rekinn sat Mourinho á skrifstofu sinni og ræddi við alla þá sem höfðu áhuga á, hann er sagður hafa sagt nákvæmlega það sem hann var að hugsa.

Mourinho er sagur hafa setið og sagt sannleikann við alla og var það kannski hans stærsti galli í starfi, hann stuðaði leikmenn með orðum sínum í gegnum mánuðina í starfi.

Í frétt Telegraph kemur fram að leikmenn hafi undir það síðasta verið hræddir við að brosa á æfingasvæðinu, óttastjórnun Mourinho var slík.