Enska úrvalsdeildin ætlar að refsa félögunum sex sem voru hluti af Ofurdeildinni frægu. Öll ensku liðin hafa þó dregið sig til baka og beðist afsökunar.

Enska úrvalsdeildin mun krefjast þess að klúbbarnir sætti sig við núverandi skipulag deildarinnar og þá helst þegar kemur að sjónvarpstekjum en það á að hafa verið ein af stærstu ástæðunum fyrir stofnun Ofurdeildarinnar.

Þá missa félögin sex völd í deildinni þar sem stjórnarmenn klúbbanna sem sitja í nefndum á vegum deildarinnar missa stöðu sína. Smærri félög fá þá sína fulltrúa inn í þessar nefndir sem gæti haft í för með sér ýmsar breytingar.

Ferran Soriano frá Manchester City og Vinai Venkatesham frá Arsenal hafa verið reknir úr sínum nefndum og planið er að Tom Werner frá Liverpool og Ed Woodward frá Manchester United segi af sér úr nefnd sem sér um sjónvarpsrétt deildarinnar.

Þá er talið að í staðin fyrir að sekta klúbbana eða taka af þeim stig þá ætli hinir 14 klúbbarnir í deildinni að láta sér nægja að fá meiri völd í nefndunum og drepa þar með hugmynd klúbbanna um „Project Big Picture“ sem Liverpool og Manchester United kynntu til leiks á síðasta ári þar sem planið var að fækka liðum í 18 og stóru klúbbarnir hefðu meiri völd og meiri sjónvarpstekjur.