Umræðan um Ofurdeildina svokölluðu síðustu daga hefur líklega ekki farið framhjá neinum. Þar höfðu 12 lið frá Englandi, Spáni og Ítalíu ákveðið að stofna sína eigin deild og segja sig þar með úr Meistaradeild Evrópu. Þessari tilkynningu var vægast sagt illa tekið, þá sérstaklega af stuðningsmönnum liðanna.
Ensku liðin Liverpool, Manchester United, Manchester City, Tottenham, Arsenal og Chelsea höfðu öll skráð sig í deildina en tilkynntu öll í gærkvöldi að þau hefðu dregið sig frá keppni vegna vaxandi neikvæðrar umræðu frá stuðningsmönnum, ensku úrvalsdeildinni og ríkisstjórn Breta.
Frétt Mundo Deportivo segir þó að önnur ástæða hafi verið að baki. UEFA á að hafa boðið ensku liðunum ansi væna summu ef þau segðu sig úr deildinni. Þetta vekur upp spurningar hvort að þetta hafi kannski verið áætlun klúbbanna allan tímann? Notuðu þessi sögufrægu félög Ofurdeildina til að fá þann pening frá UEFA sem þeim fannst þau eiga skilið?