Leikmaður í ensku úrvalsdeildinni verður myrtur ef félögin þar í landi fara ekki að auka öryggisgæslu í kringum leikmennina sína. Þetta er skoðun sérfræðings sem kafaði ofan í málið fyrir Talksport.
Leikmenn á Englandi óttast margir um öryggi sitt eftir ítrekuð innbrot á heimili leikmanna, innbrotsþjófarnir pæla ekkert í því hvort einhver sé heim. Robin Olsen markvörður Everton vaknaði upp við vondan draum þegar vopnaðir menn ógnuðu honum, eiginkonu hans og börnum ádögunum. Atvikið gerðist í úthverfi Manchester.
Mikil aukning hefur verið í innbrotum á heimili leikmanna og þjálfara um allt England. Fram kemur í rannsókn Talksport að aðeins fimm prósent af innbrotum á heimili leikmanna í ensku úrvalsdeildinni rati í fréttir. Um er að ræða skipulagða glæpastarfsemi.
„Félögin verða að axla ábyrgð, knattspyrnumenn eins og stjórnmálamenn eru í vinnunni allan sólarhringinn,“ sagði Alex Bomberg eigandi Intelligent Protection International.
Í rannsókn kemur fram að leikmenn í ensku úrvalsdeildinni séu margir að borga tæpar 5 milljónir króna á mánuði til að tryggja öryggi sitt og heimilsins. „Leikmenn eru það verðmætasta sem félag á, félög verða að hugsa betur um þá.“
Hann telur að mikil hætta sé á ferð. „Það er aðeins spurning um hvenær fjölskyldumeðlimur eða leikmaður verður myrtur, ég er alveg öruggur á því.“
Hann ráðleggur leikmönnum að fá sér öfluga varðhunda eins og margir hafa gert. „Þeir fara ekki nálægt hundinum, það hræðir manneskjur miklu meira en önnur manneskja,“ sagði Bomberg.
Gylfi Þór Sigurðsson og Jóhann Berg Guðmundsson leika báðir í ensku úrvalsdeildinni, Gylfi með Everton og Jóhann Berg með Burnley.