Leikmenn þeirra sex liða sem eru skilgreind sem Ofurdeildarlið og spila í ensku úrvalsdeildinni, hafa í dag ráðið ráðum sínum um það hvernig best sé að bregðast við þeim fréttum að lið sín séu þátttakendur í Ofurdeildinni.
Þetta herma heimildir blaðamannsins virta, Henry Winter sem starfar hjá The Times. Liðin sem um ræðir eru Arsenal, Chelsea, Liverpool, Manchester United, Manchester City og Tottenham
„Leikmenn þessara ‘stóru sex’ liða hafa rætt sín á milli hvernig best sé að bregðast við fregnum um Ofurdeildina. Það er erfitt að bíta höndina sem fæðir þig en fótboltinn þarf á því að halda að þeir láti í sér heyra,“ skrifaði Winter í innleggi sem birtist á Twitter í dag.
Ljóst er að mikið er í húfi fyrir leikmennina en forsvarsmenn UEFA og FIFA hafa sagt að þeir leikmenn sem taki þátt í Ofurdeildinni munu ekki verða gjaldgengir á mótum sambandanna, þar með talið Evrópumót og Heimsmeistaramót landsliða.
Fregnir af fyrirhugaðri Ofurdeild hafa heilt yfir lagst illa í stuðningsmenn þeirra liða sem hafa kvittað upp á það að vera hluti af deildinni.
Tilkynnt var um það í gærkvöldi að tólf evrópsk stórlið hefðu samþykkt að vera hluti af Ofurdeildinni.
Stofnfélög deildarinnar eru: Arsenal, Chelsea, Liverpool, Manchester City, Manchester United, Tottenham, Atlético Madrid, Barcelona, Real Madrid, AC Milan, Inter Milan og Juventus.
Players of Big Six clubs talking privately today about how best to respond to #EuropeanSuperLeague. Difficult to bite the hand that feeds but the game needs them to speak out. https://t.co/pmCpnnf9LA
— Henry Winter (@henrywinter) April 19, 2021