Jamie Carragher, fyrrverandi leikmaður Liverpool og núverandi sérfæðingur SkySports, telur að stuðningsmenn knattspyrnufélaga, geti komið í veg fyrir að Ofurdeildin verði að veruleika.
Carragher lét þessa skoðun sína í ljós í útsendingu SkySports fyrir leik Leeds United og Liverpool í ensku úrvalsdeildinni í kvöld. Hann kennir eigendum félaganna um þá atburðarrás sem komið hefur verið af stað.
„Það sem þeir (eigendurnir) eru að gera núna er að draga þessi félög, sem hafa lengi verið stór hluti af bresku samfélagi, í gegnum leðjuna. Eina ástæðan fyrir því að Liverpool er í umræðunni sem mögulegur þátttakandi í deildinni er velgengni félagsins í gegnum söguna.“ sagði Carragher.
Hann segir að núverandi eigendur Liverpool, séu að nýta sér velgengni félagsins í gegnum söguna, til þess að græða meira á félaginu.
Jurgen Klopp, knattspyrnustjóri Liverpool, lét í ljós skoðun sína á hugmyndum um Ofurdeildina árið 2019 og aftur í kvöld fyrir leik Liverpool gegn Leeds United. Hann er alfarið á móti slíkri deild og er þar af leiðandi á móti áætlunum núverandi eigenda félagsins. Carragher segir eigendurna ekki eiga von á góðu ef Klopp verði látinn fara á næsta 12 mánuðum vegna þessarar skoðunar sinnar.
„Ef þeir láta hann fara á næstu 12 mánuðum vegna þessarar skoðunar, þá get ég fullvisað ykkur um það að þeim verður bolað út úr félaginu á innan við viku,“ sagði Carragher sem ber greinilega mikinn kærleik í garð síns fyrrum félags.
Carragher telur að það sé enn hægt að koma í veg fyrir að Ofurdeildin verði að veruleika.
„Eigendurnir halda að allt sé klappað og klárt varðandi Ofurdeildina, ekki ég. Ég held að stuðningsmenn knattspyrnuliða, vítt og breitt um Bretlandseyjar, geti enn komið í veg fyrir þetta.“
„Eitt af því sem við elskum við þennan leik er rígurinn á milli liða,“ sagði Carragher og beindi orðum sínum til stuðningsmanna knattspyrnuliða.
„Snúum bökum saman, þið, við álitsgjafarnir í sjónvarpi, leikmenn, knattspyrnustjórar, stöndum saman og stoppum þetta. Það er hægt, ég er fullviss um það,“ sagði Jamie Carragher í útsendingu SkySports.