Viðar Halldórsson formaður FH skrifar pistil á heimasíðu félagsins þar sem hann sakar nágranna sína í Haukum um að ganga fram með ósannindi. Haukar fagna nú um þessar mundir 90 ára afmæli sínu. Viðar sakar formann Hauka, Samúel Guðmundsson um að fara með rangt mál þegar hann sagði að Haukar væru stærsta félagið í Hafnarfirði.
„Nokkur umræða hefur átt sér stað vegna greinar (viðtals) sem formaður Hauka, Samúel Guðmundsson, skrifar í glæsilegt afmælisblað Hauka sem gefið var út nú nýlega í tilefni 90 ára afmælis þess ágæta félags en fyrirsögn greinar hans er að mínu mati óviðeigandi, raunar kolröng, og er svona „pabbi minn er sterkari en pabbi þinn“, barnalegt,“ skrifar Viðar í pistli sínum á FH:is.
Viðar segir að mælingar á stærð félaga séu ekki endilega til staðar. „Fimleikafélag Hafnarfjarðar er eitt af stærri félögum á Íslandi en hvar í einhverri tilbúinni röð er algjört aukaatriði og í raun ómögulegt að segja og þá til hvers. Mælikvarði á stærð félags getur verið margvíslegur, iðkendafjöldi, fjöldi félagsmanna, fjárhagsleg umsvið, eignaleg umsvif o.s.frv., aðalatriðið er gæði íþrótta- og félagsstarfsins og þar hafa Haukar staðið sig vel að mörgu leyti og á það á formaður Hauka að leggja áherslu.“
Viðar sakar Samúel um að segja ósatt þegar kemur að iðkendafjölda hjá Haukum. „Forsendurnar sem Samúel er að nota og segir frá í greininni „Við vorum mældir nýlega sem stærsta félagið í Hafnarfirði“ og einnig „En á síðasta ári kom þarna mæling þar sem við vorum með fleiri iðkendur en FH, það finnst mér jákvætt.“ eru iðkendatölur úr Felixkerfi ÍSÍ sem er alls engin „mæling“. Iðkendatölur í Felix eru tölur innsettar af félögunum sjálfum og alveg ljóst að fjöldi félaga ber enga virðingu fyrir því kerfi og sér sér hag í verulega ýktum iðkendatölum og það er ákkúrat það sem Haukar hafa stundað. „Mælingin“ sem Samúel vitnar í er ekkert annað en röng innsetning þeirra sjálfra á fjölda iðkenda.“
Viðar skrifar svo. „Ef einhver félög í Hafnarfirði vilja endilega setja sig í einhverja röð varðandi stærð síns félags miðað við nokkuð réttann iðkendafjölda þá hefur ÍBH og Hafnarfjarðarbær á ári hverju í samstarfi við Rio Tinto úthlutað styrkjum til hafnfirskra íþróttafélaga sem miðast við fjölda iðkenda 18 ára og yngri. Niðurstaða síðustu úthlutunar („stærstu þrjú“) sem unnin er af íþróttafulltrúa Hafnarfjarðarbæjar og framkvæmdastjóra ÍBH á grunni ákveðinna reglna er einfaldlega eftirfarandi.“
Hann birtir svo tölur um iðkendur hjá íþróttafélögum í Hafnarfirði:
Fimleikafélag Hafnarfjarðar 1.702 iðkendur
Knattspyrnufélagið Haukar 1.053 iðkendur
Fimleikafélagið Björk 773 iðkendur
„Þess má geta að iðkendur í fótbolta hjá FH (1.064) eru fleiri en heildarfjöldi iðkenda hjá Haukum,“ skrifar Viðar.
Viðar segist ekki hafa viljað svara þessu en sannleikurinn sé það sem eigi að koma fram í svona máli. „Mér er þvert um geð að þurfa að setja ofnagreint á blað en „hafa ber það sem sannara reynist“ á vel við hér, ósannindi og skáldskapur á ekki að líðast í íþróttahreyfingunni frekar en annars staðar.“
