Það verður krísufundur hjá FC Bayern á næstu dögum þar sem framtíð Hansi Flick þjálfara liðsins mun ráðast. Þýskir fjölmiðlar fjalla um málið en hann er ósáttur með forráðamenn félagsins.
Mikil spenna hefur verið á milli Flick og Hasan Salihamidzic yfirmanns knattspyrnumála í tæpt ár, Flick var verulega óhress þegar forráðamenn félagsins reyndu ekki allt til þess að halda Thiago, hann var að lokum seldur til Liverpool.
Samband Flick og Salihamidzic er sagt slæmt en hvorugur vill gefa eftir og Flick vill meiri völd í leikmannamálum.
Flick er svo ósáttur með forráðamenn Bayern í dag sem ætla að leyfa David Alaba og Jerome Boateng að yfirgefa félagið frítt í sumar. Flick telur að félagið hefði getað lagt meira á sig í viðræðum við þá.
Bayern féll úr leik í Meistaradeildinni í gær gegn PSG, Bayern hafði unnið Meistaradeildina með yfirburðum á síðasta ári.
Flick er einnig óhress með þann liðsstyrk sem félagið fékk síðasta sumar en þá keypti félagið Eric Maxim Choupo-Moting, Bouna Sarr, Marc Roca og Douglas Costa. Aðeins Choupo-Moting hefur fengið eitthvað hlutverk og þá aðalega vegna meiðsla Robert Lewandowksi.
Flick er sagður spenntur fyrir því að taka við þýska landsliðinu en framtíð hans ætti að ráðast á næstu dögum.