Íþróttastarf hefst aftur á fimmtudag þegar ný reglugerð tekur gildi, starfið hefur legið niðri í þrjár vikur vegna takmarkanna í tengslum við COVID-19 veiruna.
Áhorfendur verða hins vegar bannaðir á kappleikjum en það er ekki í fyrsta sinn sem íþróttahreyfingin er ósátt með slíkt. Á meðan íþróttaáhugafólk getur ekki farið á völlinn geta gestir í leikhúsi mætt, 100 manns í hvert hólf. Er þetta ekki í fyrsta sinn sem reglugerðin er svona, margir hafa gagnrýnt þetta nú og áður.
Reglugerðin:
Íþróttaæfingar og -keppnir barna og fullorðinna með og án snertinga í öllum íþróttum heimilar, án áhorfenda. Hámarksfjöldi fullorðinna verður 50 manns en fjöldi barna fer eftir sömu takmörkunum og í skólastarfi. Skíðasvæðum heimilt að taka á móti 50% af hámarksfjölda móttökugetu hvers svæðis. Sviðlistir, þar með talið kórastarf, heimilar með allt að 50 manns á sviði og 100 sitjandi gestum í hverju hólfi, auk annarra skilyrða.
Henry Birgir Gunnarsson íþróttafréttamaður hjá Sýn bendir á þetta í dag. „Pökkum í leikhúsin og barina en leyfum ekki einn áhorfanda á íþróttaleikjum. Þórólfur er bara að endurnýta gömul skjöl. Rífa sig í gang, takk,“ skrifar Henry um málið.
Þórólfur sagði í október á síðasta ári þegar svipaðar reglur voru í gangi að meiri smihætta væri af sitjandi fólik á íþróttaleikjum en í leikhúsi. „Ég rökstyð það þannig að í leikhúsum er ákveðinn hópur fólks. Þetta eru eldri einstaklingar. Áhorfendur verða með grímur og sitja á ákveðnum stöðum. Við gerum kröfu um að fólk sé í númeruðum sætum og við höfum ekki verið að sjá nein smit í tengslum við þessa atburði,“ svaraði Þórólfur þá.
Hann sagði að smit væru tengd áhorfendum á kappleikjum. „Við höfum verið að sjá smit tengjast þeim á marga vegu. Ég held að það sé meiri áhætta í því fólgin og á því byggja mínar tillögur,“
Hanna Símonardóttir sem er mikil íþróttaáhugakona er ósátt með reglurnar. „Á aftur að safna hundrað manns á pöbbinn að horfa á leikinn saman? megum við virkilega ekki vera hundrað í þúsund manna úti stúku, með millibili, sitjandi kyrr í númeruðum sætum?,“ skrifar Hanna.
Pökkum í leikhúsin og barina en leyfum ekki einn áhorfanda á íþróttaleikjum. Þórólfur er bara að endurnýta gömul skjöl. Rífa sig í gang, takk.
— Henry Birgir (@henrybirgir) April 13, 2021
Á aftur að safna hundrað manns á pöbbinn að horfa á leikinn saman? megum við virkilega ekki vera hundrað í þúsund manna úti stúku, með millibili, sitjandi kyrr í númeruðum sætum? #sottvarnir #fotboltinet
— Hanna Símonar (@hannasimonar) April 13, 2021
