„Það er ekkert leiðinlegra en meiðsli og að vera ekki 100% í formi,” segir Jóhann Berg Guðmundsson kantmaður Burnley í ítarlegu viðtali við Hauk Harðarson á RÚV.
Kantmaðurinn knái verður í eldlínunni þegar Ísland heimsækir Liechtenstein í undankeppni HM í kvöld. Hann hefur verið mikið fjarverandi síðustu tvö ár vegna meiðsla en það horfir til betri vegar.
Jóhann segir að það bitni á fjölskyldunni þegar meiðsli koma upp. „Auðvitað bitnar þetta dálítið á fjölskyldunni þegar ég kem heim og er kannski búinn að meiðast í einhverjum leik eða æfingu. Þá er ég gríðarlega erfiður í 1-2 daga og tala lítið. Svo er það bara áfram gakk og þá byrjar endurheimtin, að reyna að koma sér aftur á völlinn eins fljótt og hægt er,” segir Jóhann Berg.
Jóhann og unnusta hans, Hólmfríður Björnsdóttir eignuðust sitt annað barn á dögunum og Jóhann segir fátt toppa það. „Það er dálítið skrítið. Það er fullorðins, maður er orðinn svo gamall. Þrítugur og tveggja barna faðir. En það er ekkert betra en þegar maður eignast fjölskyldu og eignast börn. Maður hefur átt frábærar stundir á vellinum en fjölskyldan er alltaf númer eitt,” segir Jóhann Berg.
Ítarlegt viðtal við Jóhann Berg á vef RÚV má sjá hérna.