U-beygja aldarinnar gæti átt sér stað á næstu vikum ef marka má frétt enska blaðsins Mirror í dag. Þar segir að Paul Pogba miðjumaður Manchester United sé opinn fyrir því að framlengja samning sinn við Manchester United.
Samningur Pogba við United er á enda eftir 16 mánuði, búist hefur verið við því síðustu mánuði að Pogba yrði seldur í sumar.
Pogba hefur opinberlega rætt um þá ósk sína að fara frá Manchester United, Mino Raiola umboðsmaður hans hefur einnig kveikt elda með því að ræða málið.
Pogba hefur sagt frá draumi sínum um að spila fyrir Real Madrid en hans gamla félag Juventus hefur einnig haft áhuga.
Kórónuveiran hefur hins vegar breytt landslaginu í fótboltanum, erfiðara er fyrir dýra og launaháa leikmenn að skipta um félög þessa stundina. Veiran hefur veikt fjárhag margra félaga en United gæti boðið Pogba góð laun.
United mun samkvæmt fréttum ræða framtíðina við Pogba á næstu vikum, hann gæti þá framlengt samning sinn eða tekið ákvörðun um að reyna að losna í sumar.