Enska götublaðið The Sun hefur síðustu daga fjallað ítarlega um fíkn leikmanna í ensku úrvalsdeildinni í svefnpillur. Jamie O´Hara fyrrum miðjumaður Tottenham hefur opnað sig um sína fíkn eftir umfjöllun blaðsins.
Enska götublaðið The Sun heldur því fram að fjöldi leikmanna í ensku úrvalsdeildinni séu nú orðnir háðir svefntöflum. Blaðið hefur fjallað um þessi mál síðustu vikur. Þeir sem þekkja til mála segja að leikmenn í deildinni séu farnir að bryðja Zopiclone eða Zolpidem eins og Cheerios hringi. The Sun segir að aukningin á meðal leikmanna sé mikil.
„Ég notaði þessar pillur mjög mikið, eftir leiki í miðri viku þá gat ég aldrei sofnað,“ sagði O´Hara um vandamál sitt með pillurnar.
„Þú ert með adrenalínið á fullur, þú ert að hugsa um leikinn, stemminguna og stuðningsmenn. Ég varð háður pillunum, ég vildi fá svefnpillu alla daga og þetta var orðið mikið.“
„Ég myndi ekki telja mig hafa verið algjöran fíkil en það kom sá tímapunktur sem ég vildi hætta. Ég var farin að leita alltof mikið í þetta.“
The Sun sagði í gær að tveir aðrir leikmenn tengdir enska landsliðinu séu að kaupa mikið magn af svefnpillum á svarta markaðnum.
Þar segir að eiginkona annars þeirra hafi komið heim á dögunum, þar á knattspyrnuhetjan að hafa legið hálf meðvitundarlaus í sófa sínum. Börnin voru að reyna að vekja en hann vaknaði ekki, sama hvað þau reyndu.