Ítalskir fjölmiðlar fjalla í dag um Ísak Bergmann Jóhannesson, íslenska undrabarnið sem leikur með IFK Norrkoping í Svíþjóð.
Þar segir að ítalska stórliðið Inter hafi mikinn áhuga á Ísaki og hafi sent útsendara sína á síðustu leiktíð til að fylgjast með framgangi hans í Svíþjóð.
Margir áttu von á því að Ísak yrði keyptur frá Norrkoping nú í janúar en ekkert varð af því. Ísak verður 18 ára gamall í lok mars en hann var magnaður með sænska félaginu á síðustu leiktíð.
Í ítölskum fjölmiðlum er einnig rætt um áhuga Juventus á kappanum og þá segir að Manchester United hafi einnig mikinn áhuga.
Ísak hefur sjálfur sagt að það væri draumur að spila fyrir Manchester United en hann bjó á sínum tíma í Manchester þegar Jóhannes Karl Guðjónsson, faðir hans, spilaði sem atvinnumaður í Englandi.
Líkur eru á að stórlið reyni að kaupa Ísak í sumar en öll stærstu lið Evrópu hafa sent útsendara til að fylgjast með honum Ísak spilaði sinn fyrsta landsleik fyrir Ísland gegn Englandi í nóvember.