Everton tók á móti Southampton í ensku úrvalsdeildinni í gær. Leikurinn endaði með 1-0 sigri Everton en leikið var á heimavelli liðsins, Goodison Park. Gylfi Þór var í byrjunarliði Everton og bar fyrirliðabandið í leiknum. Þá átti hann einnig stoðsendinguna í eina marki leiksins sem Richarlison skoraði á 9. mínútu.
Gylfi var til umræðu í hlaðvarpsþættinum Dr. Football í dag þar sem Hjörvar Hafliðason ræddi við sérfræðinga sína um hann. Hjörvar kastaði fram þeirri spurningu hvort hægt væri að setja Gylfa Þór í flokk með Eiði Smára Guðjohnsen og Ásgeiri Sigurvinssyni sem bestu knattspyrnumenn í sögu Íslands.
Eiður Smári og Ásgeir léku með stærri félagsliðum á sínum ferli en Gylfi hefur gert, miðjumaðurinn úr Hafnarfirði hefur hins vegar náð mikið mun betri árangri með íslenska landsliðinu og spilað í sterkustu deildum í heimi síðustu ellefu árin.
„Þegar Kaninn ræðir hlutina, þeir velta því fyrir sér hver er geitin. Þegar við förum í geitar samtalið, er ekki Gylfi að nálgast þá Ásgeir og Eið Smára? Það er eitt sem þú verður að taka inn í þetta, það er lengd ferilsins. Við verðum að vera sanngjarnir, Eiður eftir þrítugt,“ sagði Hjörvar Hafliðason um málið og Hrafnkell Freyr Ágústsson, sérfræðingur Þáttarins hafði þetta að segja um feril Eiðs Smára eftir þrítugt.
„Bara bull,“ sagði Hrafnkell um seini ár Eiðs Smára á ferlinum, en 31 árs yfirgaf hann Barcelona og gekk í raðir Mónakó.
Arnar Sveinn Geirsson var með í samtalinu í þætti dagsins og hafði gaman af ummælum Hrafnkels. „Keli jarðaði Eið Smára eftir þrítugt á tveimur sekúndum,“ sagði Arnar Sveinn, forseti leikmannasamtakanna á Íslandi um ummæli Hrafnkels
Í umræðu í Bandaríkjunum er alltaf talað um geiturnar, þar er átt við þá bestu í sögunni. Hjörvar togaði fram staðreyndir um Gylfa sem hjálpa honum þegar rætt er um þann besta í sögu Íslands. „Gylfi er búinn að draga okkur á tvö stórmót, spilar alltaf fullt af leikjum. Flest úrvalsdeildar mörkin, lagt upp flest mörkin. Getum við farið með hann í geitar talið?,“ sagði Hjörvar.
Arnar Sveinn segir að Gylfi eigi svo sannarlega eiga heima í þessari umræðu. „Hann er búinn að vinna sér inn að það sé umræða, svo er þessi tölfræði hans. Það er galið að gefa honum ekki umræðuna, gæðin í honum eru rosalega mikil. Það sem styður hann í umræðunni, hann er draumur allra þjálfara. Það virðist ekki skipta máli hvað er í gangi, hann er fyrirliði hjá Ancelotti mjög oft. Samt er umræðan um að hann geti ekki neitt.“