Wilfried Zaha kantmaður Crystal Palace er hættur að krjúpa á kné fyrir leiki og styður ekki lengur Black Lives Matter hreyfinguna.
Hann segir að hreyfingin hafi verið til að sameina fólk en að hún sundri og einangri þeldökka. Staðan sé ekkert betri.
„Ég hef sagt það áður það að krjúpa á kné gerir kannski bara lítið úr okkur, foreldrar mínir ólu mig þannig upp að ég ætti að vera stoltur af því að vera þeldökkur. Ég tel að við eigum að standa beinir í baki,“ segir Zaha um málið.
„Ég reyni að skilja tilgang þess að krjúpa á kné, þetta er bara eitthvað sem við gerum og það er ekki nóg fyrir mig.“
„Ég er hættur að krjúpa á kné, ég ætla ekki að hafa Black Lives Matter lengur á treyju minni. Mér finnst það búa til vandræði, við erum að reyna að segja að við séum öll jöfn. En við erum í raun að einangra okkur, þetta virkar ekki. Þannig líður mér.“
„Við eigum að standa uppréttir, ég ræði lítið um rasisma því það gerist aldrei neitt. Ég ætla ekki að ræða þessi mál fyrir en eitthvað er gert í hlutunum.“