„Þér er treystandi til að vera fullur á bar en ekki til að vera á íþróttakappleik,“ segir Henry Birgir Gunnarsson íþróttafréttamaður á Stöð2 Sport um þær takmarkanir sem nú gilda í samfélaginu vegna COVID-19 veirunnar, sem varla er þó til staðar á Íslandi um þessar mundir.

Ný reglugerð um sóttvarnir tók gildi á mánudag en átti að taka gildi 17. febrúar. Ráðist var í tilslakanir fyrr vegna fárra innanlandssmita undanfarið. Nýja reglugerðin gildir í þrjár vikur.

Íþróttaáhugafólk furðar sig verulega á regluverkinu sem nú hefur verið sett fram, engir áhorfendur verða leyfðir á íþróttakappleikjum. Í reglugerð segir. „Íþróttakeppni barna og fullorðinna verði heimilar án áhorfenda. Hámarksfjöldi í hólfi
hjá börnum og fullorðnum verði 50 manns.“

Á sama tíma eru 150 manns leyfðir í hvert sóttvarnarhólf þegar leiksýningar fara fram, þetta vekur furðu íþróttahreyfingarinnar.

Henry  Birgir segir það ekki halda vatni að í lagi sé að fara á barinn en það sé ekki í boði að horfa á kappleiki hjá börnunum sínum. „Það er búið að opna barina, fjölga í leikhúsunum, en ekki verið að hleypa áhorfendum í íþróttahús eða foreldrum á leiki hjá börnunum sínum.“

Henry segir að íþróttir virðist vera afgangsstærð í samfélaginu á nýjan leik. „Það sem að slær mig við þetta er að í þessu ferli virðast íþróttir enn og aftur vera afgangsstærð þegar það er verið að ákveða sóttvarnareglur og breytingar á þeim. Við höfum séð að íþróttir eru mjög aftarlega á merinni þegar kemur að ákvarðanatökunni og stundum hef ég á tilfinningunni að Þórólfur og Svandís viti ekki hvað íþróttir eru. Þær bara eru ekki til umræðu. Algjör afgangsstærð,“ segir Henry Birgir sem ræddi málið við Kjartan Atla og Rikka G í hlaðvarpsþættinum, Sportinu í dag.