Tvö kynferðisbrotamál af þeim fjórum sem úttektarnefnd ÍSÍ segir að KSÍ hafi haft vitneskju um eru annars vegar tengd dómara á vegum sambandsins og hins vegar tengd starfsmanni yngri landsliða sambandsins. Þetta kemur fram í skýrslu úttektarnefndarinnar sem var birt í dag.

Samkvæmt þeim upplýsingum sem úttektarnefndin hefur aflað hefur KSÍ frá árinu 2010 fengið ábendingar eða tilkynningar um tvö mál ótengd landsliðsmönnum íslands í knattspyrnu sem varða kynferðisofbeldi. Annað málið mun varða knattspyrnudómara sem hafi hlotið dóm fyrir nauðgun en sá einstaklingur mun tafarlaust hafa verið látinn hætta dómgæslu í kjölfar þess að dómur um sakfellingu kom til vitneskju KSÍ

Beiðni mannsins um að hann fengi að dæma leiki á meðan mál hans væri í áfrýjunarferli var hafnað af hálfu KSÍ og hefur hann ekki dæmt leiki síðan fyrir sambandið.

Hitt málið mun varða hegðun einstaklings sem sinnti tímabundnu verkefni sem verktaki í keppnisferð eins af yngri landsliðum Íslands og beindist að starfsmanni hótels sem liðið dvaldi á. Sá verktaki mun ekki hafa sinnt neinum verkefnum fyrir KSÍ eftir að sambandið fékk vitneskju um málið.

Auk þess er nefndinni kunnugt um tvö mál frá árinu 2010 þar sem KSÍ hefur þurft að taka á kynferðislegri áreitni af hálfu einstaklings sem sinnt hefur verkefnum innan knattspyrnuhreyfingarinnar á vegum KSÍ. Þar sem umboð úttektarnefndarinnar náði einungis til þess að fjalla um vitneskju innan stjórnar og starfsmanna KSÍ um kynferðislegt og kynbundið ofbeldi telur nefndin ekki rétt að fjalla sérstaklega um atvik þeirra mála í þessum kafla skýrslunnar.

Þann 22. september síðastliðinn skipaði ÍSÍ nefnd til að gera úttekt á viðbrögðum og málsmeðferð KSÍ vegna kynferðisofbeldismála sem tengst hafa leikmönnum og landsliðum Íslands. Nefndin hefur nú lokið störfum og skilað af sér niðurstöðum

„Nefndin telur ljóst að KSÍ hafði brugðist við í þremur þessara mála, annaðhvort með því að leikmaður var sendur heim úr landsliðsverkefni eða því að viðkomandi starfaði ekki aftur fyrir KSÍ,“ segir í umfjöllun nefndarinnar um málið.