Everton hefur áhuga á að ráða Jose Mourinho sem knattspyrnustjóra ef Rafa Benitez verður látinn fara. Þetta kemur fram í frétt Mirror.
Benitez tók við Everton í sumar. Gengið undanfarið hefur þó verið allt annað en gott. Liðið er sem stendur í fimmtánda sæti ensku úrvalsdeildarinnar með 15 stig.
Þá hefur Everton ekki unnið í síðustu átta leikjum. Sannfærandi 1-4 tap gegn erkifjendunum í Liverpool í vikunni var svo ekki til að bæta álit stuðningsmanna Everton á Benitez, sem er auðvitað fyrrum stjóri Liverpool.
Ljóst er að pressa hefur myndast á Benitez. Fari svo að hann verði rekinn þá gæti félagið snúið sér að Mourinho.
Portúgalinn tók við Roma á Ítalíu í sumar. Hann væri þó opinn fyrir því að snúa aftur í ensku úrvalsdeildina. Þar hefur hann áður stýrt Chelsea, Manchester United og Tottenham.