Aston Villa tók á móti Leicester í síðasta leik dagsins í ensku úrvalsdeildinni.
Fyrri hálfleikur var afar fjörugur. Harvey Barnes kom Leicester yfir á 14. mínútu með marki eftir góðan undirbúning Patson Daka.
Forystan lifði aðeins í um þrjár mínútur. Þá jafnaði Ezri Konsa fyrir heimamenn. Staðan í hálfleik var 1-1.
Varnarmaðurinn Konsa skoraði svo aftur fyrir Villa á 54. mínútu. Hann skoraði þá með skalla eftir fyrirgjöf John McGinn.
Bæði lið fengu færi til að bæta við mörkum en allt kom fyrir ekki. Lokatölur 2-1 fyrir Aston Villa.
Lærisveinar Steven Gerrard eru í tíunda sæti deildarinnar með 19 stig, eins og Leicester sem er þó sæti neðar á markatölu.