Ralf Ragnick, bráðabirgða knattspyrnustjóri Manchester United, sat fyrir svörum á sínum fyrsta blaðamannafundi fyrir félagið í morgun. Ragnick var ráðinn sem bráðabirgða knattspyrnustjóri félagsins út yfirstandandi tímabil en útilokar ekki að stýra liðinu lengur.
,,Í þeim samtölum sem ég hef átt við forráðamenn félagsins hafa þau skilaboð verið skýr að ég er núna í starfi til sex mánaða. Við höfum ekki rætt það hvað mun gerast í sumar. Ef þeir vilja tala við mig um það munum við sjá hvað gerist. Ef allt fer að óskum hér gæti ég stungið upp á því að við myndum halda áfram á sömu braut líkt og ég gerði hjá RB Leipzig.“
Samningur hjá Ragnick hjá RB Leipzig var framlengdur um eitt ár á sínum tíma sökum þess hversu vel liðinu gekk innan vallar.
Eftir að sex mánaða samningur Ragnicks rennur út hjá Manchester United gerir áætlun Manchester United ráð fyrir því að hann muni taka að sér ráðgjafastarf til tveggja ára. Ragnick segist hins vegar ekki hugsa svo langt.
,,Hjá mér snýst þetta allt um að vinna næsta leik,“ sagði Ralf Ragnick, bráðabirgða knattspyrnustjóri Manchester United á blaðamannafundi í dag.