Gott gengi Bernardo Silva, leikmanns Manchester City í ensku úrvalsdeildinni, undanfarið er að stórum hluta til vegna þess að leikmaðurinn hefur fengið að eyða tíma með kærustu sinni, Ines Tomaz Silva, að nýju.
Þessi 27 ára gamli Portúgali hefur verið mjög flottur með Englandsmeisturunum á þessari leiktíð. Silva hefur skorað fimm mörk og lagt upp eitt í þrettán leikjum.
Silva átti erfitt uppdráttar þegar kórónuveiran herjaði sem mest á Evrópu og útgöngubann var í gildi. Þá fékk hann ekki að hitta Ines.
Nú hafa þau hins vegar verið sameinuð að nýju. Líf Silva utan vallar í dag hefur jákvæð áhrif á spilamennsku hans.
,,Ég hef það á tilfinningunni að hann sé ánægður hér. Hann er ánægður með lífið utan vallar og getur átt stórkostlegt tímabil með okkur aftur,“ sagði Pep Guardiola, stjóri Silva hjá City.
,,Bernardo hefur sérstaka hæfileika til að gera það sem hann vill með boltann. Ef þið horfið á hann fyrir tveimur eða þremur tímabilum þá sjáið þið leikmanninn sem þið sjáið um þessar mundir.“