Íþróttavikan var á sínum stað á Hringbraut í gær en gestir þáttarins voru Henry Birgir Gunnarsson og Máni Pétursson.

Benedikt Bóas Hinriksson sat við stýrið og fór meðal annars yfir fréttir vikunnar.

Jón Rúnar Halldórsson, fyrrum formaður knattspyrnudeildar FH, sendi bréf á stjórn KSÍ þar sem hann sagði Kolbrúnu Hrund Sigurgeirsdóttur, formann starfshóps á vegum KSÍ, vera siðblinda. Hann krafðist þess að Kolbrúnu yrði vikið frá störfum hjá KSÍ þar sem hún leiddi starfshóp sem skoðaði meðferð ofbeldismála hjá sambandinu. Jón Rúnar sakaði Kolbrúnu um að standa fyrir áróðri til stuðnings Vöndu Sigurgeirsdóttur, núverandi formanns KSÍ, fyrir komandi ársþing sambandsins sem fer fram í febrúar. Þar verður kosið í embætti formanns KSÍ.

,,Hún (Kolbrún) er bara með grímulausan kosningaáróður fyrir Vöndu og segir ‘við verðum að halda henni, annars var þetta bara allt til sýnis.’ Þetta er í raun og veru bara svona dulbúin hótun, ef að þið kjósið ekki Vöndu og hafið hana ekki áfram, þá er bara eins og allt sé hrunið,“ sagði Henry Birgir og hélt svo áfram.

,,Þetta er einhver slappasti varnarleikur sem ég hef séð lengi. Hún er þarna að vinna að mjög þörfum verkefnum fyrir knattspyrnusambandið en á ekki að vera reka einhvern áróður um það hver eigi að vera formaður KSÍ. Gagnrýnin er rétt hjá Jóni en að sama skapi gengur hann náttúrulega aðeins of langt. Það að saka Kolbrúnu um að vera siðblinda er náttúrulega fullkomlega galið. En gagnrýnin sem slík á fullan rétt hjá sér.“

Máni tók þá til máls. „Jón Rúnar er fyrsti maðurinn til að viðurkenna það að hann hafi gengið of langt með því að nota orðið siðblinda en hann hefur ábyggilega gert það meðvitað að mörgu leyti.“

,,Þetta er eins og við værum með kosningasjónvarp á RÚV og einn kosningaskýrandinn myndi segja bara daginn fyrir kosningar: ‘En eins og við vitum öll, ef við viljum halda stöðugleika í þessu landi þá verða allir að kjósa Sjálfstæðisflokkinn.’ Það myndi allt tjúllast. Mönnum fannst þetta bara allt í lagi einhvern veginn.“