Jóhann Berg Guðmundsson gaf ekki kost á sér í landsliðshóp Íslands fyrir komandi leiki gegn Rúmeníu og Norður-Makedóníu í undankeppni HM 2022.
Leikmaðurinn gerði það heldur ekki í síðasta landsliðsverkefni í október. Það var vegna smávægilegra meiðsla. Jóhann hefur undanfarið verið að berjast fyrir sæti sínu í byrjunarliði Burnley í ensku úrvalsdeildinni.
„Jói, við vorum í samskiptum við alla. Jói er á þeim stað hjá sínu félagsliði að hann er inn og út, honum líður ekki 100 prósent með sinn líkama og hvernig er að ganga hjá Burnley. Eins og Jói sagði við okkur þá vildi hann vera 100 prósent til að geta gefið 100 prósent fyrir landsliðið,“ sagði Arnar Þór Viðarsson, landsliðsþjálfari, eftir að hafa kynnt hópinn í gær.
Albert Brynjar Ingason, leikmaður Fylkis, sagði í hlaðvarpsþættinum Dr. Football í gær að hann héldi að meira lægi að baki ákvörðun Jóhanns um að gefa ekki kost á sér.
,,Hann ætti alveg að geta tekið þetta verkefni. Ég er ekki að kaupa að það sé út af einhverjum meiðslum,“ sagði Albert.
Hann hélt áfram. ,,Ég held að það sé meira á bakvið þetta en einhver smávægileg meiðsli.“